Moi…
An Nu, Wa ni Pyawpoi
Pru sa ai shaloi
Yu makrai, madoi chyai chyi re ai
Ngaprip Kasha ni mung
Daini yawng asan gung
          Rai mat sai Nu e…

Ngai Kasha…
Grai hkriba ai ten wa dung
Sa sa re ai Sa-ra mung,
Daini shakrin shakrawt rai
Grai kahtet mat sai
          Nu e…

Moi an Wa…
Ngajaw Si tam gawam hkawm yang
Mu kau da ang
Ai Tsihkrung Tsinan ni mung,
Daini Nep, Myiprwi she tung
Hkra gademi tam abram bram
Aru pi n ngam
          Mat sai Wa e…

An Nau ni…
Shaning shagu
Di sha chyai chyai re ai Shayu
Si Ahpun mung n tu
          Mat sai Kanau ni e…

Moi Jiwoi, Jiwa ni…
Jashim, kyem da ya ai
Nhprang Sutrai,
Sali wunli ni mung tsai,
Lagu, gashun la kau ya masai
          Jinghku ni e…

Prat shanat…
N htum n mat hkra
Gang da ai Maisak maling ni wa
Daini yawng shanyen la
Kau ya masai
          Jinghku ni e…
 

Nu yan Wa… Ap da ya ai dusat, yamnga
Ni mung sharat shara mung n na,
Shingran n mu,
Ali di na pi n lu
          Mat sai Jinghku ni e…

Moi tsaw Jan the An…
Hkrumzup ai Hpaji Ginra mung hkoi,
Wanli gashoi,
Wan N-yang poi,
Wanwu she gahpoi
Nat kau ya masai
          Tsaw Jan e…

Moina…
Pyawngawn simsa ai,
Kahtawng Nchyawng ni mung tsai;
Ginding Dinghta ntsa,
Nep, Myiprwi she shaya
Sharung shayawt hkrap ra
          Mat sai Jinghku ni e…

Hkai da ai…
Nsi Naimam ni
Hkunhkraw nna si
          Mat sai Jinghku ni e…

Krawsi hpanggara ai Lihku,
Zinli zindam the du,
Hkraula ai zawn zawn pru,
Tsihkrung tsinan shingran mu,
Lu, sha hpa mung yupmang hta chyu,
Kashu, kasha ni a matu,
Gade ahkrai yutim n lu,
Myit htum na lam pru;
N ni n kri,
Hkriba lit li;
Garut garoi,
Hkrap ngu hkrap ngoi,
Shara shagu Mang bru poi;
Sharung Shayawt ra sai
Mungdan tai,
Myit malai lu ni ai
          Jinghku ni e.