Ala:
“Ndai hka kata kaw gaw n nga ai, le she yu yu u : hkarang ntsa hkan grai prang hkawm nga ma ai”.

Ahkawn:
“Ha..ha..ha....chye na sai, chye na sai.”

Ala:
“E..chyena jang gaw, hpabaw hpe ngu mayu rai taw?”

Ahkawn:
“Hmm...Kara gyi gyi re ai anhte Wunpawng shayi ni hpe tsun mayu ai nrai i, Ala?”

Ala:
“Ahkawn grai zen ai she rai nga ai.”

Ahkawn:
“N zen ai law...”

Ala:
“Nau she zen...nau she zen...”, “Ahkawn zawn zai, nyan rawng ai Wunpawng shayi ni law law raiyang gaw anhte Mungdan lawan lu na re i.” “Ya ten hta le i... Soi ngu yang, Buri gra re ai Wunpawng shayi, shadang ni grai naw law nga ai”. “Dai ni a matu anhte galoi mung myit sawn nna shanhte yawng Ahkawn zawn chye myit wa lu na matu gaw, Ahkawn a lit, Ala a lit, prat ram ai anhte ramma ni yawng a lit nan rai sai...n rai i? Ahkawn”.

Ahkawn:
“Ala tsun ai ga ni grai jaw ai. Ahkawn, mungdan hpe tsawra ai majaw, Mungdan Shanglawt magam gun hpai na matu asak apnawng sa wa ai re”.

Ala:
“Ahkawn a ntsa Ala grai arawng la ai yaw. Ala mung laika sharin ngut jang yawng a gawng malai tai, Mungdan Shanglawt Magam gun hpai na myit da ai re”.

Ahkawn:
“Ala, Mungdan Shanglawt Magam hta tsap nga ai ni sha, anhte a Wunpawng Mungdan hpe gaw gap ai n re : Ala zawn, tinang a myusha ntsa, myu a matu myit sawn chye nna tinang myu kaji kadun wa na lam hpe koigam, byin wa na ra ai mabyin masa ni hpe tau jau (hkrau) chye ai gaw, Mungdan shanglawt hpyendap hta magam gun ai hta nna pi grau nga sai”.

Ala:
“Oh teng ai...Ala chyena sai. Ndai Mungkan hta apnawng ai masha n nga yang, dinghta gaw gaman sha re”. “Dai majaw, Ahkawn zawn asak apnawng, tinang amyu yawng a matu Mungdan magam gun hpai nga ai gaw anhte prat ram ai ramma ni yawng a kasi mung rai nga sai”.

Ahkawn:
“Tinang amyu hpe, masha wa tsawra makawp maga ya na n re. Dai majaw, Ahkawn mung hpaji n chye tim, Ahkawn galaw lu ai made hte mungdan bungli hta tsap nga ai re, Ala”.

Ala:
“Ahkawn e, anhte a Wunpawng Mungdan Shanglawt Hpung a kata hta, chye ai ni hkrai n mai, n chye ai ni hkrai mung hpa n tai; yawng shang lawm ra ai bungli re majaw, tinang chye da ai hpaji, tinang hta rawng ai atsawm hte Wunpawng Mungdan Gawgap ai kaw jailang jang rai sai”.

Ahkawn:
“E...Ala taw she yu yu u : Lung rawk lapran tsip da ai utsip hta u kasha ni wa le. Kanu shat tam nna wa jaw taw nga ai! Hpabaw U ta? Grai tsawm ai”

Ala:
“Oh....e le i! U Hkaima da - Ahkawn. Ndai U amyu gaw, nau tsawm ai majaw, moina salang ni tsun chye ma ai : Hpyi lu ai shayi ni sha mu ai da. Raitim ya gaw, Jaugawng ni nau gyam gap nna grai taw mat sai - Nam maling hkan sha nga chye ai rai nna, ginhtawng ta (ten) hta ndai zawn re ai lungrawk ni a lapran hkan tsip tsip chye ai U amyu re”.

Ahkawn:
“Aga....Ala; Ahkawn hpe Hpyi lu ai ngu ai hku i taw? Ngai na Hpyi grai ja ai re lu, Ala i...hi...hi...hi”. Ahkawn shala tsun let Ala hpe ndum ai sha ahpum dat nhtawm, Ala a myi hpe azi yu let tsun dat ai ga gaw: “Ala nang Ahkawn hpe gade’ram (gade daram) tsawra ai rai?”

Ahkawn hpe myit kata tsawra nga sai Ala tsun dat ai gaw: “Ahkawn hpe Ala shinglet hte tsun n dang hkra Tsawra ai”. “Ahkawn, an lahkawng le grai tsawra taw nga sai re i”?

Ahkawn:
“Ala, Ahkawn teng sha tsun ga nga yang, Ahkawn’aw Ala hpe garai n mu ai ten kawn’ na yu sai hte tsawra nga sai re. Ala n chye ya ai majaw sha Ahkawn daini du hkra yupmang hta mung Ala hpe chyu, myit masin mahkra Ala hpang gawai du nna, Ahkawn langai sha hkamsha yak nga ai ten ram ram na sai re. Ahkawn a li la ai lit hpe Ala shayu kau ya nit dai. Ala zawn myit su nna samnang maka kap ai shadang la’sha (la kasha) langai mi a tsawra myit hpe Ahkawn lu la ai majaw grai kabu nngai. Ala hpe Ahkawn grau tsawra ai re”. “Raitim’ung, Ahkawn a myit hta tsang ai lam langai mi nga ai : Ahkawn’aw mungdan bungli ang ai de hkawmsa ra ai majaw, Ala hte tsan-gang na hpe grai tsang la nngai”.